नेपाल राष्ट्र बैंकको नीतिका कारण बजारमा परेको प्रभावको विषायमा अर्थमन्त्री डा. प्रकाशशरण महतको ध्यान आर्कषण भएको छ । सोमबार शेयर बजारका लगानीकर्ताको भेटमा अर्थमन्त्रीले बजारलाई अप्ठेरो पार्ने खालका नीतिहरू परिमार्जन गर्नका लागि राष्ट्र बैंकसँग छलफल भएको अर्थ मन्त्रीले बताएका हुन । अर्थमन्त्रीसँगको भेटमा मौद्रिक नीतिको तेस्रो समीक्षा मार्फत शेयर बजारलाई सहजिकरण गराउन आग्रह गरेका छन् । पूँजी बजारका लगानीकर्ताहरुले अर्थमन्त्रीसँगकाे भेटमा पुँजी बजार सुधारका लागि विभिन्न ६ बुँदे माग राखेका छन् । नेपाल इन्भेष्टर्स फोरम, सेयर लगानीकर्ता संघ नेपाल र नेपाल पुँजी बजार लगानीकर्ता संघका प्रतिनिधिहरुको टोलीले अर्थमन्त्रीलाई भेट गरेका हुन । लगानीकर्ताहरुले खुला रुपमा नयाँ ब्रोकर लाइसेन्स, नयाँ स्टक र कमोडिटी एक्सचेन्जको लाइसेन्स वितरण प्रक्रिया बिना ढिलासुस्ती कार्यान्वयन गर्न आग्रह गरेका छन् । नेपाल राष्ट्र बैंकले धितो कर्जामा कायम रहेको १२ करोड रुपैयाँको सीमा खारेज गर्नुपर्ने र १५० प्रतिशत पुर्याइएको जोखिम भारित औसतलाई पुनः १०० प्रतिशतमा नै कायम गर्नुपर्ने माग छ ।